WILLEMSTAD – “Ta e temporada di mas horibel di mi bida”, Ana Molina (42), venesolano, ta konta ku awa na wowo. Ana ta konta di e temporada ku el a traha na Kòrsou komo trago-meisje*.
Ta trabou di sèks ku mayoria di hende muhé venesolano ilegal ta kai aden. Esaki a sali tambe den investigashon resien di tres studiante di Universidat di Maastricht.
Video: Kim Hendriksen
Ta kai Ana duru ku e mester a bende su kurpa pa e por a mantené su famia. “E manera ku hende hòmber ta tratá bo ta bèrdaderamente inhumano. Manera ta puta bo ta, pero mi no t’asina niun ora. Mi no tabatin otro eskoho”, segun e mama di tres yu.
Nuebe persona di su famia ta dependé di e tiki sèn ku Ana ta gana i ta manda tur luna pa Venezuela. Shen florin pa siman. Apénas e famia, ku ta konsistí di sinku adulto, tres mucha i un baby, por hasi algun kompra kada luna ku esaki.
Pa motibu di e krísis ekonómiko den e pais e mayoria di famianan na Venezuela no ta logra gana basta sèn. Suèldu mínimo a baha te 4 dòler pa luna, miéntras ku mayoria di produktonan ta kasi dos bia mas karu ku na por ehèmpel Kòrsou.
Ana a siña pa enfermera. Den e añanan promé ku e krísis el a traha den un klínika privá. E ta bini di un famia di empresario chikí, semper el a sali bon ku su sèn i e tin tres yu tiner ku ta studia. Nunka e no a pensa ku e por a kai den e situashon aki.
Vulnerabel
Segun Ana e úniko paso pa hende muhé manera dje ta prostitushon. Traha manera un asina yamá trago-meisje. Aki nan ta haña nan konfrontá ku eksplotashon i nan ta biba den mal lugá di biba. Esaki ta sali tambe den e investigashon di e studiantenan di Universidat di Maastricht.
E studiantenan na petishon di e fundashon lokal Famia Planiá tres luna largu a hasi investigashon di e sirkunstanshanan di biba i traha di trago-meisje na Kòrsou. E fundashon a pidi esaki pasobra nan a mira un oumento di e kantidat di trago-meisje ku ta traha na bar chikí lokal, òf mihó bisá snèk.
Skapa
Aworakí tantu Ana komo Maria, ku ta kompartí un lugá di biba kuné, a logra skapa di nan bida den prostitushon. Ana a haña trabou via un kliente i e ta kuida un hòmber grandi di edat. Maria a haña un trabou komo trahadó di limpiesa.
* E palabra trago-meisje ta bini di e palabra spaño trago, loke ke men ‘un drenks’. E mucha muhénan ta traha den snèk i nan ta haña komishon pa e kantidat di drenks ku nan ta laga hòmber kumpra pa nana, tin bia nan ta laga e hòmbernan paga pa sèks.
** Nòmber fiktivo. E nòmber mes ta konosí serka redakshon.