A prolongá medidanan di corona: Kon futuro ta mustra?

Portrèt: Pixabay

13 April 2020 | Elisa Koek

WILLEMSTAD – A prolongá e medidanan di corona ku dos siman. Un sla pa empresarionan, pero segun epidemiólogo Izzy Gerstenbluth “nesesario pa destruí e kurva”.

Esei ta e maneho di Kòrsou, pasobra Kòrsou no tin e espasio pa wak kiko ta sosodé ora hende bira malu. Pero ki ora i kon finalmente lo redusí e medidanan i unda e isla ta pará aworakí?

Esakinan ta e pasonan
Na promé instansha lo evaluá e medidanan ku tin influensha lokal. Den e fase aki Kòrsou ta aktualmente. Pa esaki mester a hasi tur preparashon, por ehèmpel riba tereno di kapasidat.

“Mester tin kama di kuido intensivo èkstra disponibel i médiko”, promé minister Eugene Rhuggenaath ta splika. Via un avion di Defensa e nesesidatnan pa 12 kama di Kuido Intensivo (KI) a yega Kòrsou. Tambe tin un barku na kaminda for di Hulanda ku médiko i material èkstra.

Suavisá medida

E di dos fase ta pa bèrdaderamente suavisá e medidanan. E siman aki ta wak si esaki por kaba. Nos mester pensa riba:

  • Posibilidat pa hende por hasi deporte/move
  • Apertura di take-out pa restorant i trùk’i pan
  • Apertura di kompania di konstrukshon i hartwèr
  • Adaptashon di e ‘plachi di dia’ *)
  • Mas libertat pa sali bai pafó
  • Apertura di skolnan na un dado momentu

Apertura di fronteranan
Ora a tuma e pasonan aki sin muchu problema i si no ta trata di un oumento grandi di e kantidat di kontaminashon, lo wak e apertura di frontera.

Dia 13 di mart a sera esaki pa buelo oropeo i djis despues pa tur buelo. For di 30 di mart residente tampoko no por regresá na e isla. Tin eksepshon por ehèmpel pa spesialista ku ta bin duna asistensia, pero nan mester bai den karentena obligatorio dos siman.

Kondishonnan

Ora e fronteranan habri, problemente lo tin kondishon relatá na esaki, manera:

  • Apertura di frontera solamente pa pais ku ta ‘liber di corona’
  • Laga solamente hende ku tin un ‘health alert’ drenta
  • Laga solamente hende drenta ku tabatin dos siman den karentena

Bèk pa e situashon normal?
E apertura di e fronteranan por lo pronto ta e último fase promé ku e situashon na Kòrsou ‘normalisá’, pero promé minister ta avisá ku e ora ei tambe bida lo ta diferente. Asina lo keda un prohibishon pa evento grandi i mester mantené dos meter di distansha na trabou i lugánan públiko.

Tambe den e tempu binidero lo sigui tèst hende riba e vírùs di corona i tin un karentena obligatorio na vigor pa hende ku tin chèns di tin e vírùs.

Plachi di dia
For di promé di aprel na Kòrsou e areglo di plachi di dia ta na vigor. Esaki ta enserá ku bo por sali pa hasi kompra òf bai botika riba e dianan ku bo lèter ta na turno. Bo lèter ta e promé lèter di e number di bo outo. Pa kada lèter a reservá dos dia di siman.