ROTTERDAM – Pa motibu di e medidanan di corona den henter Reino tin studiante sintá na kas. Na Hulanda esaki lo keda asina sigur te 19 di mei i kisas mas largu. Kon komo studiante den e tempu insigur aki bo ta mantené fókùs í alkansá bo metanan di estudio? Eksperto di enseñansa Jean Marie Molina ta duna tep.
Promé ku e krísis di corona Molina komo dosente prinsipal di éksito di estudio na Skol Superior di Rotterdam a bati alarma kaba tokante e kantidat kresiendo di studiante ku pa falta di guia ta lucha ku retraso di estudio. Espesialmente studiante karibense leu for di kas ta sufri mas pisá di esaki.
“Awor ku studiante ta na kas pa motibu di e krísis di corona ta mas importante ku nunka pa duna nan medionan pa mantené e fókùs i e drive den nan estudio”, Molina ta konta.
Propio eskoho
Ku su método Molina ke duna studiante forsa i kòntròl riba nan bida. “E kos ta kuminsá kaminda bo ta puntra bo mes pakiko bo a skohe pa un estudio i e realisashon ku ta bo eskoho.”
“Asina bo aseptá esaki i e situashon ku bo t‘aden bo por tuma responsabilidat bo mes i traha duru pa esaki.”
Kiko si finansieramente bo no sali ku bo sèn?Pa motibu di e krísis di corona kisas bo a pèrdè bo trabou di den banda òf bo tin gastu èkstra. DUO ta ofresé studiante ku haña nan den problema finansiero e posibilidat pa (temporariamente) oumentá nan fiansa òf pidi un beka adishonal. Si no opstante e posibilidatnan aki tòg bo ta haña bo den problema, bo por tuma kontakto ku DUO. “Nos ta palabrá e situashon i lo anda kuné mas fleksibel posibel”, DUO ta skibi riba e website. Kisas bo por haña prolongashon pa bo término di diploma tambe. Si bo ke sa ku bo ta bini na remarke bo mester tuma kontakto ku bo dekano di estudio di bo skol òf universidat. |
Traha plan realístiko
Traha plan i hasi eskoho i pone meta realístiko ta partinan importante den e método ku Molina ta usa.
Asina e dosente hefe ta rekomendá pa parti un meta di estudio den tarea i pone un liña di tempu na esakinan ku ta alkansabel. “Traha ku un lista di tarea i disidí kuantu tempu bo mester pa kada tarea. Inkorporá tempu pa un pouze tambe.”
Ken ta Jean-Marie Molina?Jean-Marie Molina ta pedagogo filosófiko i dosente hefe di éksito di estudio na Hogeschool van Rotterdam. Tambe e tin un ofisina di guia, The Graduation Clinic, ku un fókùs èkstra riba studiante karibense. Meskos ku hopi di su studiantenan Molina komo studiante hóben a yega for di Karibe (Sint-Eustatius) pa studia na Hulanda. Molina ta traha segun e método yamá ‘tough love’, un modelo di edukashon dirigí riba oumento di kompetensia. “E meta ta pa ‘empower’ studiante pa desaroyá independientemente.” Na mart Molina a tene un Ted-talk tokante su ‘método tough love’. Komo studiante òf mayor bo tin un pregunta urgente tokante enseñansa òf un problema ku bo no ta bini kla kuné? No keda kibra kabes pero hasi bo pregunta seka e eksperto di enseñansa Jean Marie Molina via retkaribense@ntr.nl (anónimo tambe ta posibel). |