DEN HAAG – Ombudsman Nashonal entrante otro siman lo bai trata keho na papiamentu tambe, asina ombudsman Reinier van Zutphen ta bisa. Un grupo di su kolaboradónan despues ku tabatin krítika ta bai siña papiamentu.
Aña pasá den un publikashon di Ret Karibense tabatin krítika pisá riba Ombudsman Nashonal despues di un biahe di bishita pa Boneiru. Habitante ku por a papia solamente papiamentu, pa motibu di esaki no por a haña ayudo ku nan kehonan kontra gobièrnu seka e tim.
“Mi a skucha e krítika masha bon”, Van Zutphen ta enfatisá. “Ora mi a lesa esaki, mi a realisá ku Konseho Insular a pone papiamentu komo kondishon importante na 2012. I nos ta komprondé kon importante ta pa papia den bo idioma materno pa depositá un keho seka nos.”
“Awor nos a tuma un persona den servisio ku ta papia papiamentu. E koleganan ku a lanta na Hulanda a sigui lès di papiamentu i te ainda ta hasi esaki.” Ademas e Ombudsman mes tambe por papia un tiki papiamentu pa motibu di su trabou anterior komo wes na Kòrsou.
Mas kontakto ku habitantenan di Boneiru, Saba i Sint-Eustatius
Lo amplia e oranan di konsulta telefóniko for di otro siman. Habitante ku ta eksperensiá problema ku gobièrnu, tur djaluna por risibí un yamada di telefon grátis di e tim na Den Haag. Ke men na papiamentu tambe.
Banda di esaki tur rapòrt i relato anual tokante Karibe lo sali tambe na papiamentu i ingles. Tambe e kolaboradónan lo haña entrenamentu tokante e kultura i e diferenshanan den regla entre Karibe i Hulanda.
Ombudsman ta ‘severo’ pa su mes
“Krítika riba bo mes ta importante, pasobra nos tambe ta gobièrnu porfin”, segun Van Zutphen tokante e añanan ku a pasa. “Mi ta haña importante pa mi duna e bon ehèmpel, pa mi ta severo pa mi mes. Mi mester demonstrá ku por otro, pa asina hende konfia mi ku nan kombersashonnan.”
“Ombudsman Nashonal último tempu tambe tin un manera diferente pa ekspresá krítika. No ta solamente: raportá, at’akí e rekomendashonnan i konklushonnan, siguiente kaso. Nos a siña di esaki. Kritiká mas tantu por ta den forma di un karta kòrtiku òf un entrevista.”
‘Hopi keho di habitantenan karibense a yuda’
|
No warda keho tur ora
Van Zutphen mas tantu ke hasi investigashon di su propio intenshon den Karibe. Ora bo kabes henter dia ta okupá ku e situashon finansiero difísil, bo pensamentunan ta: mi tin di kome si? E ora ei bo no tin tempu òf atenshon pa un karta pa gezaghèber òf un email pa Ombudsman.”
“Tambe si únabes bo haña ku gobièrnu a trata bo fo’i sla, bo no tin masha konfiansa den entregamentu di keho. Pa nos esaki tambe ta un motibu pa no warda te ora hende aserká nos. Manera un problema asina di awa na Sint-Eustatius, ku ta un problema grandi i serio, bo mester bai p’e manera nos ta bai aktualmente.”
Mas sèn pa investigashon den Karibe
Ombudsman Nashonal a haña mas sèn seka Den Haag pa yuda e habitantenan di e munisipionan karibense Boneiru, Saba i Sint-Eustatius. Remarkabel ta ku e kantidat di keho aña pasá a oumentá ku trinta porshento di 191 (2018) pa 220 (2019.
Atrobe tin atenshon pa pobresa
E aña aki di tur manera lo bini investigashonnan amplio di e situashon penoso pa adulto hóben i famia ku un mayor so. Tambe lo investigá e situashon di pobresa di e islanan, i kon polítika ta trata esaki, di nobo.
