WILLEMSTAD – Imigrante, entre nan venesolano sin papel huntu ku habitante di bario ta traha asina yamá boske di kuminda na Kòrsou. Pa berdura i fruta mas barata pero tambe pa integrashon.
Reportahe di Kim Hendriksen (na hulandes)
Ta un pilot di e organisashon internashonal pa migrashon (IOM) ku ku e programa Respons 4 Venezuela (R4V) ta duna yudansa humanitario.
“Un di e áreanan kaminda ainda nos no tabata traha kuné ainda ta e tema integrashon. Pa promové e integrashon di imigrante for di diferente kultura, nos a kuminsá un koperashon ku e proyekto kaminda ta traha boske di kuminda den diferente bario na Kòrsou”, e kordinadó di e programa Joeri Arion ta splika.
Na Kòrsou den diferente bario ta transformá pida pida tereno bashí den hardin komun i boske di kuminda . Benjamin Visser di Samyama Permaculture Transition ta konta: “Nos ta trahando huntu ku IOM i e habitantenan di Montaña pa lanta un boske di kuminda nobo. Huntu ku Joeri nos a buska un sitio komun kaminda nos por invitá habitante di bario indokumentá tambe.”
‘Hende indokumentá ta trahando huntu ku otro habitante di bario’
Joeri Arion, IOM
Joeri Arion, IOM
Esaki ta bira e di tres boske di kuminda kaba ku Visser ta traha huntu ku boluntario na Kòrsou. IOM aktualmente tin 11 proyekto ta kana riba diferente tereno manera edukashon, protekshon i kuminda. E inisiativa di Visser ta ofresé un bunita okashon pa traha na integrashon, Arion ta bisa:
“Hende indokumentá ta trahando pafó den un hardin di bario huntu ku otro habitante di bario. Hende ku koperá na e proyekto ta doño di e kurá, pues nan por kosechá loke nan a sai.”
Aktualmente segun e kordinadó di programa ainda no a mira hopi hende indokumentá di e bario. “Esei ta lástima. Pero esaki ta un proyekto ku mester di un tempu mas largu pa e kuminsá kore.”
Hopi venesolano nobo na Kòrsou
Segun Arion tin hopi venesolano nobo na e isla. “Mi ta kere ku pa hopi di nan ta konta ku pa loke ta konekshon ku e komunidat kurasoleño ainda tin hopi di logra. Tin hopi interes pero e prioridatnan ta ta e realidat den kua nan ta biba. Naturalmente e promé nesesidatnan di bida tin prioridat riba interkambio kultural. Covid a hasi e proseso aki ainda mas kompliká i di durashon mas largu. Pero tur pida pida ta yuda i esun aki tambe, mi ta spera.”