E èks minister arubano i parlamentario aktual Benny Sevinger a haña un aña di kastigu di sèl, di kua seis luna kondishonal, pa soborno i malversashon. Tampoko e no por pone su mes elegibel ni traha komo ámtenar pa sinku aña.
Segun wes e polítiko lo a laga soborn’é ku regalo i donashon di amigu i partidario di AVP. A kambio e tabata pone tereno di erfpacht disponibel, ku tabata bende ku terser persona pa suma haltu.
Mésora despues di e sentensia e polítiko a apelá.
“Mi a paga pa hèkwèrk, pero wes no a mira e bònnan; mi por prueba. E hèkwèrk tabata un regalo i e sponsoring a bai via e fundashon. Esakinan ta dos punto ku nos ta bai sigui lucha pa nan”, segun Sevinger kontra Ret Karibense mésora despues di e sentensia.
Regalo i téket di biahe
Via su fundashon Fundacion Curason Berde (FCB) e èks minister lo a risibí sigur 170.000 florin na donashon i sponsoring. Tambe e lo a paga téket di biahe pa su esposa ku sèn di e fundashon.
Di kos di bebe pa e kumpleaño di su yu muhé, te yudansa pa e konstrukshon di su kas. Sevinger tabata haña masha regalo en kambio pa sitio kumbre manera Eagle Beach i Palm Beach/
E regalonan i donashonnan ta bini di persona ku tabata spera ku e komo minister lo disidí bentahosamente tokante na petishonnan pa erfpacht. Sevinger ta ninga ku el a duna ken ku sea tratamentu di preferensia.
‘Araña den nèshi’
Ministerio públiko a pidi sinku aña kastigu di sèl. Sevinger segun OM lo ta fungi komo sospechoso mayó i komo ‘araña den su nèshi’ den diferente parti di e kaso di korte Avestruz.
Tambe OM tabata ke pa, pa e dies añanan binidero, no permití elegí e polítiko komo polítiko òf nombr’é komo ámtenar, pero wes a haña e prueba insufisiente.
“Esaki ta mustra ku mi a hasi mi trabou segun konsenshi”, Sevinger a bisa despues di e sentensia djabièrnè atardi.
Wes: Benny no ta araña den nèshi (na hulandes)
Mashin di stèmpel
Durante e kaso den korte a tilda Sevinger ku e ta un ‘mashin di stèmpel’ ku tabata duna su aprobashon tur kaminda pa petishon di tereno di erfpacht. Durante su término di trabou el a firma mas ku 4000 petishon pa tereno di erfpacht.
“Bèrdat. Mi no tabata ke pa nan reprochá mi ku mi ta faboresé hende, tur hende ku a bini serka mi tabata OK i na DIP (Dienst Infrasructuur en Planning, red.) nan mester a hasi nan trabou”, tabata su kontesta.
Mas invershonista despues di soborno
Segun wes Sevinger ta kulpabel di soborno i esei ta kousa daño enorme na e isla.
Wes: daño di imágen pa Aruba (na hulandes)
Serka e kastigu a inkluí ku pa sinku aña Sevinger no por partisipá na elekshonnan i no por traha komo ámtenar. Kiko e sentensia ta nifiká pa su karera polítiko e no por a bisa djabièrnè. “Mi mester palabrá esei promé ku e partido.”
Sevinger tabata minister di Infrastruktura, Integrashon i Planifikashon Espasial pa AVP di 2009 te 2017. E ta parlamentario i te ainda miembro di e mésun partido ku aktualmente ta den oposishon.
| Sentensia completo (livestream di korte) |
No tin tereno mas pa tres añaE kaso penal tabata kontra mas persona, entre na ámtenar. A kondená seis sospechoso pa kastigu parsialmente inkondishonal. A kondená kuater persona pa dos aña den sèl ku un aña kondishonal i un but di sèn pa motibu di estafa. Tur kuater sospechoso ta haña un periodo di prueba di tres aña den kua nan no por atkirí tereno bou di niun ni ningun nòmber. Un èks ámtenar, i amigu di Sevinger, a haña dos aña kastigu di sèl ku un aña kastigu kondishonal pa motibu di soborno aktivo i labamentu di plaka. Banda di esei a konfiská e ganashi di 1.3 mion dòler binidero di e benta di su terenonan di erfpacht. Ademas un empresario a haña un kastigu di trabou i un but di sèn pa motibu di soborno. Sinku otro sospechoso a sali liber. |