Un komunikado di prensa falsu tabata e último gota ku a pone diputado di Finansa Anthony Weber tuma distansia for di e Kolegio Ehekutivo di Boneiru. E paso akí ta un gòlpi mas pa e gobernashon boneriano.
Riba 26 di mart último Weber a pone su funshon komo diputado pa e partido polítiko M21 na disposishon di Konseho Insular. Weber ta ninga di sigui traha komo parti di e Konseho Ehekutivo aktual. Ku urgensia M21 a pone un rueda di prensa, pa splika pueblo dikon el a tuma e desishon akí.
Komunikado na su nòmber
E diputado tin diferensia di opinion ku su koleganan tokante kon transparente gobièrnu mester ta ku pueblo, sin embargo, esaki no ta e motibu prinsipal pa su desishon. “Ku diferensia di opinion i di idea bo por sigui traha huntu ainda. Esei ta polítika,” Weber ta bisa. Loke sí e no por aseptá ta e echo ku Kolegio Ehekutivo a saka un komunikado di prensa na su nòmber sin ku e tabata na haltura di e kontenido.
Boneiru tin mas ku dos luna sin un koalishon stabil. Te ku awe, tur intento òf negosiashon pa yega na un koalishon nobo a stanka. Pues Boneiru tin un koalishon di minoria, i ta teme ku esaki lo keda asina te e siguiente elekshon na mart di 2027.
Lomba kontra muraya
Resientemente Kolegio pa Supervishon Finansiero (CFT), a kritiká e atministrashon finansiero di Entidat Públiko Boneiru den un karta pa Gezaghèber John Soliano.
Prensa lokal a mèldu ku Weber ta haña opstrukshon di su dos otro kolega den Kolegio Ehekutivo: e ta hasi palabrashonnan ku CFT, pero e no por mantené òf kumpli ku esakinan, pasobra e dos otroonan ta vota kontra su proposishonnan. Djárason 25 di mart último a sali un komunikado di prensa ofisial di e Entidat Públiko na nòmber di Weber, desmintiendo tur loke prensa a mèldu.
Awor ta resultá ku nunka Weber a skirbi e komunikado: ni sikiera el a tuma nota di esaki. “Pueblo di Boneiru, ami no a skirbi e komunikado ei. Ku esei opviamente mi a pèrdè konfiansa den mi koleganan den ‘Bestuurscollege’ (Kolegio Ehekutivo),” Weber a bisa.
Moshon di deskonfiansa
Na e momentu akí Konseho Insular ta na turno pa aktua. Awor ku Weber a denunsiá e Kolegio Ehekutivo públikamente pa sakamentu di un dokumentu falsu, Konseho Insular mester disidí ki paso lo tuma.
Segun eksperto polítiko Willem Cecilia tin sufisiente motibu pa Konseho Insular pasa un moshon di deskonfiansa kontra e Kolegio Ehekutivo. Si a base di un mayoria, den e kaso akí ku por lo ménos 5 voto, Konseho Insular tuma e paso akí, e Kolegio Ehekutivo ta bai kas un bes.
‘Klaridat’
Awor e funshon di Weber ta na disposishon di Konseho Insular. Pues un biaha mas e bala ta den skochi di Konseho Insular, i awor ta parse ku no tin otro opshon: Konseho Insular mester aktua. Konsehal Jona Chirino-Felida ta kontentu ku e akontesimentunan. “Ta bon ku Weber a tuma e desishon. Awor tin klaridat i tur hende sa na unda e ta pará. Asina nos tambe sa ki desishon nos tin ku tuma,” e ta bisa.
Djamars 31 di mart, den e siguiente reunion di Konseho Insular, lo mester sali na kla si di bèrdat Konseho Insular lo pasa un moshon di deskonfiansa.
