WILLEMSTAD – Kòrsou tin algun aña kaba ta keha tokante e konsekuenshanan negativo di e fluho grandi di migrante venesolano. Pero niun hende no sa bèrdaderamente kon grandi e problema ta, asta gobièrnu no sa. P’esei ta falta un bon trato di e problema í entre otro hende muhé venesolano ta bira víktima di esaki.
E último aki a sali entre otro despues di investigashon di Universidat di Maastricht di e sirkunstanshanan di bida i e bienestar di hende muhé venesolano indokumentá riba e isla. Esakinan hopi bia no tin otro rekurso ku kuminsá traha den e negoshi di trago. Nan mester traha bou di sirkunstansha di trabou malu i ku ganashi masha abou.
Tambe e muhénan ta haña nan ku eksplotashon, nan ta biba den sirkunstansha malu i nan ta vulnerabel pa diskriminashon i eksklushon sosial.
E investigadónan ta saka entre otro e konklushon aki: “Kuminsá ku registrá. Na un manera ku ta garantisá seguridat di e migrante venesolano.”
Minister di Gobernashon Planifikashon i Servisio Armin Konket, ta rekonosé ku ‘ta nesesario’ pa kolektá informashon. “Mi ta riska bisa ku niun hende no sa kuantu venesolano tin riba e isla i unda nan ta kedando.”
Tòg e petishon pa e investigashon aki no a bini di gobièrnu di Kòrsou, sino di Fundashon Famia Planiá. E fundashon pa hopi tempu kaba ta mira un oumento grandi di e kantidat di muhé venesolano ku ta haña nan mes fòrsá di traha den ‘negoshi di trago’ di kua prostitushon por forma un parti.
“Registrashon di venesolano indokumentá lo ta un paso den bon direkshon”, Marisela Fleming, direktor di Famia Planiá, ta bisa. “Venesolano indokumentá tambe mester haña akseso na kuido di salubridat, lugá pa biba, merkado laboral i edukashon.”
 portrèt: Kustwacht Curaçao Relatonan ku ta hasi dolóE relato di e èks trago-meisje Ana i di Maria ku a yega ku barku ilegalmente, ta ehèmpelnan ku ta hasi doló, di migrante venesolano na Kòrsou. Pero nan no ta eksepshon; hopi kompatriota ta sufri e mésun destinu.. |
CBS Hulanda ta kolektá dato na Kòrsou
“Pa por traha e maneho drechi, gobièrnu mester kuminsá kolektá mas dato. E datonan aki por yuda trese klaridat den e pregunta sosial aki”, Robert Hermans, Direktor di Desaroyo di Sentronan di Data Regional di Ofisina Sentral di Estadístika (CBS, Centraal Bureau voor Statistiek) na Hulanda ta bisa.
Huntu ku CBS Kòrsou e ta ehekutá un proyekto ku mester pèrkurá pa e ministerionan den gobièrnu traha mas ku fókùs riba dato. “Aktualmente nos no a haña un petishon konkreto for di gobièrnu di Kòrsou pa buska dato spesífikamente tokante e problema aki (migrante venesolano red.) Pero sí nos ta investigando e posibilidatnan”, Hermans ta konta.
Minister Konket ta reakshoná ku e no ta esun ku ta disidí ki dia Kòrsou ta kuminsá ku esaki. Segun e e pregunta aki ta kai bou di mas ministerio. Konket ta di akuerdo si ku e kolekshon di e datonan aki ta nesesario: “Si nos sa kiko ta e grandura di e situashon, nos por formulá problema mihó i e ora ei bo ta kapas tambe pa tuma akshon pa solushoná e problemanan.”
